POWELL OG PRESSBURGER MÁNUÐUR: A Canterbury Tale (Kantaraborgarsaga)
Leikstjórinn Michael Powell og handritshöfundurinn Emeric Pressburger ríktu yfir breskum kvikmyndum á fimmta og sjötta áratug síðustu aldar. Myndir þeirra voru ekki aðeins fáránlega skemmtilegar heldur einnig fullar af undrum og töfrum. Við sýnum fjórar af helstu myndum þeirra; Red Shoes (uppáhaldsmynd Martin Scorsese og fyrirrennari Black Swan), A Matter of Life and Death með David Niven, I Know Where I’m Going með Wendy Hiller og A Canterbury Tale – tilbrigði þeirra félaga við samnefndan sagnabálk Chaucers – nema bara allt öðruvísi!
HVER MYND ER SÝND ÞRISVAR SINNUM UM SITTHVERJA HELGI.
- Tegund og ár: Leikin mynd, 1944
- Lengd: 124 mín.
- Land: Bretland
- Texti: Nei (á ensku)
- Leikstjóri: Michael Powell
- Handrit: Emeric Pressburger og Michael Powell
- Aðalhlutverk: Eric Portman, Sheila Sim og Dennis Price
- Dagskrá: Powell og Pressburger mánuður
- Sýnd: 25.-27. febrúar 2011
EFNI: Árið er 1943 og Bretland á í stríði. Ung stúlka, breskur liðþjálfi og amerískur starfsbróðir hans koma kvöld eitt með lestinni til smábæjar í nágrenni Kantaraborgar. Þar er ráðist á stúlkuna af ókunnum manni og lími hellt í hár hennar. Stúlkan fær hermennina til að hjálpa sér að finna árásarmanninn. Grunur beinist að virðulegum broddborgara bæjarins, sem er umhugað um varkárni í samskiptum heimamanna, sérstaklega kvenfólksins, við amerísku hermenninna. Þau ganga á hann í lestinni til Kantaraborgar og hann meðgengur. Í Kantaraborg bíður þeirra að þiggja blessun eða gera yfirbót.
UMSÖGN: Myndin tekur nafn sitt frá Kantaraborgarsögum Chaucers og byggir á inntaki þeirra að því leiti að lýsa sérkennilegum persónum í nokkurskonar pílagrímaför. Sagan gerist á stríðsárunum og var m.a. ætlað að fjalla um og styrkja samband Breta og Bandaríkjamanna og auka skilning milli þjóðanna, en á þessum tíma voru tugþúsundir bandarískra hermanna komnir til Bretlands að hjálpa til í stríðinu við Hitler.
